Beñat Azurmendi, Jaime Bengoa, Iratxe Acha, Mikel Lezamiz, Alfonso Pardo, José Antonio Robredo (arriba), Laida San Sebastián, Patxi Olabarria, Amaia Arregi, Jokin Díaz, Maider Morras, Isabel Cortadi y Maite Legarra (abajo).
Lankidetza publiko-pribatuko akordio baten bidez, El Diario Vasco, Arrasateko Udala, Eusko Jaurlaritza, Kooperatiben Goren Kontseilua, Konfekoop, MONDRAGON Korporazioa, Gipuzkoako Foru Aldundia eta Mondragon Unibertsitatea, duela 4 urtetik, Mondragon City Challenge izeneko ekintzailetza kooperatiboko munduko txapelketa antolatzen aritu dira, batxiler, prestakuntza ziklo eta unibertsitateko ikasleei zuzenduta, ekintzailetza kooperatiboko portaerak sustatzeko eta gazteak eredu kooperatibora hurbiltzeko, eredu horretan oinarritutako proiektuak garatuz. ALE hiru ediziotan aritu da tutore, eta edizio horietako bakoitzean hautatutako proiektu ugari tutorizatu ditu.
Topaketa Kooperatiboak duela lau urte sortu ziren, Mondragon City Challenge ez zegoen urteetan alternatiba gisa. Ekimenaren helburua belaunaldi berriak eredu kooperatibora hurbiltzea da, ekintzailetzarako aukera erreal bat eskainiz.
Aurten ekitaldiak formatua aldatuko du, eta ikasle gazteak gure ikastoletara hurbilduko ditu, antolatzaileak Mondragon City Challengeren edizioetako berberak izanik. Helburua da topaketa modu ludiko batean egitea, mezuak atseginak izan daitezen, eta, horretarako, zer hobe “scape room” bat baino (aisialdiko ekintza murgiltzaile eta kooperatibo bat da, non parte hartzaile talde batek asmakizunak eta enigmak asmatu eta zeregin fisikoak edo logikoak egin behar dituen helburu bat lortzeko, denbora tarte jakin batean). Antolatzaileekin batera, lankidetzan arituko dira Aliantza Kooperatiboa, Saiolan, Leartibai, Garaia, Asekoop eta gure elkartea bera, “Arizmendiarrieta Lagunak Elkartea”.
Motorrak berotzeko, joan den apirilaren 16an, DV Gunean, antolakuntzako ordezkariek eta laguntzaileek “Scape Room” pilotuan parte hartu zuten, Topaketetan parte hartuko duten ikasleen lekuan jarrita, Euskapek (Scape Roomak sortzen espezialista den enpresa) kooperatibismoari lotutako galderetan eta dinamiketan oinarrituta planteatutako enigmak ebazteko. Parte hartzaileak hiru taldetan banatu ziren –ALEren ordezkaria Mikel Lezamiz izan zen–, eta lehiaketa eta lankidetza uztartu zituzten, gazteei helarazi nahi zaizkien printzipioak islatuz.
Aste honetan ikasleei egokituko zaie txanda. “Scape Rooma” Gipuzkoako hiru ikastetxetara joango da, hau da, Tolosako Inmakuladara, Arrasateko Gaztelupe-Arizmendi Ikastolara eta Donostiako Ekintza ikastolara. Diseinatutako jokoaren bidez, gazteek kooperatiba baten dinamika eta enpresa egiteko modu horrek transmititzen dituen balioak ezagutuko dituzte, formatu dibertigarri eta erakargarri baten bidez.